PASTORALA

Aurkikuntzen eta laguntasunaren etapa

Txiki hasten dira, baina  jakin-minez, graziaz eta abenturazaletasunez betetako aurrenerabe bihurtuta amaitzen dute etapa. Sasoi horretan jakiten dute zer garrantzitsua den laguntasuna, eta orduan ematen dituzte lehenengo urratsak autonomiarantz, gurasoen babesetik pixkanaka bereizten direlarik.

Aldaketa horien erdian, Jesus da inoiz huts egiten ez duen Laguna. Haren aurrean posible da bihotza zabaltzea. Lehenengo Jaunartzea jasotzeko prestatzen dira, eta haietako asko Ibiltariak taldeetan sartzen dira, mundua aldatzearekin amesten duten lagun misiolariekin. Etapa garrantzitsua da barnetasuna sendotzeko eta babesa eta laguntza ematen dituen Jainko Lagun baten gertutasuna sentitzeko.

Nerabezaroa: nork bere historia eraikitzea

Aukeraz, pozez eta erronkaz betetako lau urte. Nerabeek beren nortasuna bilatzen dute eta erabakiak hartzen ikasten dute. Etapa horretan eskaintzen dizkiegun esperientziak ez dira bizitzekoak, barnean gordetzekoak eta irakatsi bihurtzekoak baizik.

Nerabeak beren historiaren protagonista eta eraikitzaile dira, eta horretaz jabetu daitezen nahi dugu. Jainkoa beti ondoan dutela deskubritzen dute, Jainkoa mila modutara ageri baita haien eguneroko bizitzan. Begirada heztea —barrurantz zein kanporantz— erronka bat da, zentzua, lasaitasuna eta osotasuna lortzeko.

Etorkizunari itxaropenez begira

Hazi egin dira. Pare-parean daukate etorkizuna. Aukeraz betetako munduak erakarri egiten ditu, baina kezka ere eragiten die. Etapa horretan, behartsuenenganako boluntariotzak erakusten die gai direla gizartea eraldatzeko eta pozgarriagoa dela ematea jasotzea baino.

Esperientzia esanguratsuek gonbidatzen dituzte galderak egitera eta erantzunak haien barnean, Jainkoa zain duten lekuan bilatzera. Gogorarazten diegu Bera beti bidelagun izango dutela eta bizitzak ez duela zentzurik ez bada besteen alde ematen, horixe baita existentziaren berezko esanahia.

Ilusioak eta proiektuak dituen pertsona batek, Jainkoa barruan duen norbaitek, beldurrik gabe eta itxaropentsu ekingo dio etorkizunari.

FESTA: fedearen poza transmititzen duten familiak

Fedea familian bizitzen eta transmititzen dela sinesten dugu. Seme-alabek nekez barneratuko dute fedea, baldin eta haien etxean bizitzen ez badute. Etxeko Elizan ikasten da Jainkoarekin topo egiten.

Azken urteotan, pastoral familiarra hazi eta hazi egin da ikastetxean. FESTA lau taldetan antolatuta dago: Haur Hezkuntza + LH1/2, LH3-6, DBH-BTX eta Helduak. Talde horiek, etapa bakoitzeko pastoralaren arduradunekin batera, Ebanjelioaren poza elkarrekin bizitzeko proposamenak diseinatzen dituzte.

Pastorala: komunitate oso bati bizia ematen dion bihotza

Pastoralak koordinatzen du ekintza etapa guztietan. Pastoralak laguntzen die familiei, eta Ibiltariak eta JAIA fede-taldeak dinamizatzen ditu. Madeleine komunitatearen parte da, eta harekin batera amesten du bizitzaz eta konpromisoz betetako etorkizuna. Tenplu berriak topagune bihurtu nahi du. Hango alaitasunak, elkartasunak, sakontasunak, samurtasunak, Jainkoaren presentzia lagun, mundua eraldatzera eta berritzera eramango gaitu.

Bizia letra larriz loratzen da Aldapeta Maria Ikastetxean. Gugana gerturatzen denak komunitate alai eta anitza ezagutuko du. Maitasunez jasotzen duen komunitate bat gara; behar gehien dutenez kezkatuta dagoen komunitate bat. Denak sentitzen dira parte, nor bere modura. Gauzarik deigarriena bertan arnasten den maitasuna eta igandeko eukaristietan dagoen ilusioa dira. Horiek dira familia giroko benetako topaguneak, hortxe elkartzen baitira irakasleak, familiak, begiraleak, katekistak, gitarra jotzen duten gazteak, tenplua bizitasunez betetzen duten haurrak, irribarre egiten duten aitona-amonak… Denak dira protagonista, ondo prestatutako ospakizun xume eta ederrean.

Atmosfera berezia nabari da: Jesus dago erdian, pertsona ororen eta ikastetxearen bihotzean. Fedea hirian barrena hedatzen da, osmosi bidez bezala. Eta Mariak irribarre egiten du misio horri begira.